ಮಿಗ್-21 ಯುದ್ಧ ವಿಮಾನದ ಮತ್ತೊಂದು ಪತನ : ಭಾರತಿಯ ವಾಯುಪಡೆ ಪೈಲಟ್ ಹುತಾತ್ಮ | ಜನತಾ ನ್ಯೂಸ್
1792
ಮೊಗಾ : ಭಾರತಿಯ ವಾಯುಪಡೆಯ ಮಿಗ್-21 ಯುದ್ಧ ವಿಮಾನ ಗುರುವಾರ ತಡರಾತ್ರಿ ಪಂಜಾಬ್‌ನಲ್ಲಿ ಅಪಘಾತವಾಗಿದ್ದು, ವಾಯುಪಡೆಯ ಪೈಲಟ್ ಒಬ್ಬರು ಹುತಾತ್ಮರಾಗಿದ್ದಾರೆ. ಗುರುವಾರ ತಡರಾತ್ರಿ ಪಂಜಾಬ್ ನ ಮೊಗಾ ಜಿಲ್ಲೆಯ ಬಳಿ ಮಿಗ್-21 ಬೈಸನ್ ವಿಮಾನ ಅಪಘಾತಕ್ಕೆ ಒಳಗಾಗಿದೆ, ಎಂದು ಭಾರತೀಯ ವಾಯುಪಡೆ (ಐಎಎಫ್) ಟ್ವೀಟ್ ನಲ್ಲಿ ತಿಳಿಸಿದೆ. ಅಪಘಾತ ಸಂಭವಿಸಿದಾಗ ವಿಮಾನವು ದಿನನಿತ್ಯದ ತರಬೇತಿ ಹಂತದಲ್ಲಿತ್ತು, ಎಂದು ಮೂಲಗಳಿಂದ ತಿಳಿದು ಬಂದಿದೆ.
ಪಶ್ಚಿಮ ವಲಯದಲ್ಲಿ ಐಎಎಫ್‌ನ ಬೈಸನ್ ಯುದ್ಧ ವಿಮಾನದ ಅಪಘಾತ ಸಂಭವಿಸಿದೆ. ಪೈಲಟ್, ಸ್ಕ್ವಾರ್ದನ್ ಲೀಡರ್ ಅಭಿನವ್ ಚೌಧರಿ ಅವರಿಗೆ ಮಾರಣಾಂತಿಕ ಗಾಯಗಳಾಗಿತ್ತು. ಐಎಎಫ್ ದುರಂತ ನಷ್ಟವನ್ನು ಶೋಕಿಸುತ್ತಿದೆ ಮತ್ತು ದುಃಖಿತ ಕುಟುಂಬದೊಂದಿಗೆ ದೃಡವಾಗಿ ನಿಂತಿದೆ, ಎಂದು ಐಎಎಫ್ ಟ್ವೀಟ್ ಮಾಡಿತ್ತು.
ಘಟನೆಯ ಕಾರಣವನ್ನು ತನಿಖೆ ಮಾಡಲು ಕೋರ್ಟ್ ಆಫ್ ಇನ್ಕ್ವೈರಿ(ಸಿಒಐ) ನ್ಯಾಯಾಲಯದ ವಿಚಾರಣೆಗೆ ಆದೇಶಿಸಲಾಗಿದೆ, ಎಂದು ಐಎಎಫ್ ಹೇಳಿದೆ.
ಈ ವರ್ಷ ಮಿಗ್-21 ಒಳಗೊಂಡ ಮೂರನೇ ಅಪಘಾತ ಇದು. ಮಾರ್ಚ್ ನಲ್ಲಿ, ಯುದ್ಧ ತರಬೇತಿ ಕಾರ್ಯಾಚರಣೆಗೆ ವಿಮಾನ ಹೊರಟಾಗ ವಾಯುಪಡೆಯ ಗ್ರೂಪ್ ಕ್ಯಾಪ್ಟನ್ ಮೃತಪಟ್ಟಿದ್ದರು. ಫ್ಲೈಯಿಂಗ್ ಕಾಫ್ಫಿನ್ಸ್(ಹಾರುವ ಶವಪೆಟ್ಟಿಗೆ) ಎಂದು ಸಾಕಷ್ಟು ಕುಖ್ಯಾತಿಗೆ ಕಾರಣವಾಗಿರುವ ಮಿಗ್-21 ವಿಮಾನದ ಹೆಸರನ್ನು ಐಎಎಫ್ ತನ್ನ ಟ್ವೀಟ್ ನಲ್ಲಿ ಉಲ್ಲೇಖಿಸದೇ ಕೇವಲ ಬೈಸನ್ ವಿಮಾನ ಎಂದು ತಿಳಿಸಿದೆ.
