ಕಪ್ಪು ಶಿಲೀಂಧ್ರ ರೋಗಕ್ಕೆ ಉಚಿತ ಚಿಕಿತ್ಸೆ ಒದಗಿಸಿ: ಪ್ರಧಾನಿಗೆ ಸೋನಿಯಾ ಗಾಂಧಿ ಆಗ್ರಹ | ಜನತಾ ನ್ಯೂಸ್

ನವದೆಹಲಿ: : ಕಪ್ಪು ಶಿಲೀಂಧ್ರ ಪ್ರಕರಣಗಳಲ್ಲಿ ಉಚಿತ ಆರೈಕೆ ಮತ್ತು ಅಗತ್ಯ ಪ್ರಮಾಣದ ಔಷಧ ಒದಗಿಸಲು ಕ್ರಮವಹಿಸಬೇಕು ಎಂದು ಒತ್ತಾಯಿಸಿ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾಗಾಂಧಿ ಅವರು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿದ್ದಾರೆ.

ಈ ಕುರಿತು ಪ್ರಧಾನಿಗೆ ಪತ್ರ ಬರೆದಿರುವ ಅವರು, ಆಯುಷ್ಮಾನ್ ಭಾರತ್ ಯೋಜನೆಯಡಿ ಈ ಬ್ಲ್ಯಾಕ್ ಫಂಗಸ್ ನ್ನು ಸೇರಿಸಿಲ್ಲ, ಅದೇ ರೀತಿ ಹಲವು ಅನೇಕ ಆರೋಗ್ಯ ವಿಮಾ ಯೋಜನೆಗಳಲ್ಲಿಯೂ ಸೇರಿಸಿಲ್ಲ, ಹೀಗಾಗಿ ಈ ಕುರಿತು ತಕ್ಷಣ ಕ್ರಮ ಕೈಗೊಳ್ಳಬೇಕು. ಬ್ಲ್ಯಾಕ್ ಫಂಗಸ್‍ನ್ನು ಸಾಂಕ್ರಾಮಿಕ ಎಂದು ಸಾಂಕ್ರಾಮಿಕ ರೋಗ ಕಾಯ್ದೆಯಡಿ ಘೋಷಿಸಬೇಕೆಂದು ರಾಜ್ಯ ಸರ್ಕಾರಗಳನ್ನು ಸಹ ಸೋನಿಯಾ ಗಾಂಧಿ ಒತ್ತಾಯಿಸಿದ್ದಾರೆ.

ಕಪ್ಪು ಶಿಲೀಂಧ್ರ ಚಿಕಿತ್ಸೆಗೆ ಲಿಪೊಸೊಮಲ್‌ ಅಂಪೊಟೆರಿಸಿನ್‌ ಬಿ ಔಷಧ ಅಗತ್ಯ ಎಂಬ ಮಾಹಿತಿ ಇದೆ. ಆದರೆ, ಇದು ಮಾರುಕಟ್ಟೆಯಲ್ಲಿ ಅಗತ್ಯ ಪ್ರಮಾಣದಲ್ಲಿ ಲಭ್ಯವಿಲ್ಲ ಎಂಬ ವರದಿಗಳಿವೆ ಎಂದು ಗಮನ ಸೆಳೆದಿದ್ದಾರೆ.

ಈ ಮಧ್ಯೆ, ಬಿಜೆಪಿಯ ಹಿರಿಯ ನಾಯಕ ಪ್ರಕಾಶ್‌ ಜಾವಡೇಕರ್ ಅವರು, ಸರ್ಕಾರ ಈಗಾಗಲೇ ಕಪ್ಪು ಶಿಲೀಂಧ್ರ ನಿರೋಧಕ ಔಷಧಗಳ ಆಮದಿಗೆ ಕ್ರಮವಹಿಸಿದೆ ಹಾಗೂ ದೇಶೀಯವಾಗಿ ಉತ್ಪಾದಿಸಲು ಐದು ಕಂಪನಿಗಳಿಗೆ ಲೈಸೆನ್ಸ್ ನೀಡಲಾಗಿದೆ ಎಂದು ತಿಳಿಸಿದ್ದಾರೆ.